सनवल (नवलपरासी), भदौ १६।
महाकवि देवकोटा क्याम्पस, सनवलले आफ्नो Job Placement Cell को पहलमा आउँदो महाकवि रोजगार मेला–२०२५ (Mahakavi Job Fair–2025) आयोजना गर्ने भएको छ। क्याम्पस परिसरमै हुने यो रोजगार मेला भदौ १७ गते बिहान ८ बजेदेखि बेलुकी ५ बजेसम्म सञ्चालन हुने आयोजक समितिले जनाएको छ।
मेलामा विभिन्न बैंक, बीमा कम्पनी, शैक्षिक संस्था, उत्पादन तथा सेवा क्षेत्रका प्रतिष्ठित कम्पनीहरू सहभागी हुनेछन्। एकै थलोमा रोजगारी अवसर र योग्य जनशक्ति बीच प्रत्यक्ष सम्पर्क हुने भएकाले यसलाई स्थानीय तथा क्षेत्रीय युवाहरूका लागि महत्वपूर्ण अवसरका रूपमा हेरिएको छ।
कार्यक्रम संयोजक केशव भण्डारीका अनुसार, मेलाको प्रमुख उद्देश्य हालसालै स्नातक तथा स्नातकोत्तर तह पूरा गरेका विद्यार्थीलाई उद्योग–व्यवसायसँग प्रत्यक्ष सम्पर्कमा ल्याई कार्यक्षेत्रमा प्रवेशको अवसर दिलाउनु हो। साथै, यसले युवाहरूलाई आफ्नो दक्षता, सीप र क्षमता प्रदर्शन गर्ने मंच उपलब्ध गराउनेछ भने रोजगारीदातालाई योग्य जनशक्ति छनोट गर्न सहज वातावरण प्रदान गर्नेछ।
महाकवि रोजगार मेलाले रोजगारी खोज्ने युवामात्र होइन, रोजगारीदातालाई समेत लाभ दिने अपेक्षा गरिएको छ। कम्पनीहरूले ठूलो संख्यामा योग्य उम्मेदवारहरूमध्ये आफ्नो आवश्यकताअनुसार छनोट गर्न सक्नेछन्। यसैगरी, यस्ता कार्यक्रमहरूले शैक्षिक संस्थाले उत्पादन गरेका जनशक्तिको गुणस्तर, सीप र व्यवहारिक क्षमताबारे उद्योग–व्यवसायलाई प्रत्यक्ष जानकारी दिने भएकाले शिक्षा र रोजगारीबीचको खाडल कम हुने विश्वास लिइएको छ।
क्याम्पस प्रमुख नारायण प्रसाद ढकालका अनुसार, यो मेला केवल रोजगारी अवसर प्रदान गर्ने मात्र नभई विद्यार्थीहरूलाई Career Counseling, CV Writing, Interview Preparation जस्ता सीपसम्बन्धी मार्गदर्शन उपलब्ध गराउने बहुआयामिक मंच पनि बन्नेछ।
युवाहरूलाई रोजगारीसँग जोड्ने र शैक्षिक संस्थाको प्रत्यक्ष प्रभावकारिता देखाउने प्रयासका रूपमा महाकवि रोजगार मेला–२०२५ स्थानीयस्तरमै महत्वपुर्ण कार्यक्रमका रूपमा स्थापित हुने अपेक्षा गरिएको छ।
