काठमाडौं । काठमाडौं महानगरपालिकाले महानगरभित्रका सम्पूर्ण विद्यालयहरूलाई तीन दिनका लागि बन्द गर्ने निर्णय गरेको छ। सोमबार महानगरले सार्वजनिक गरेको सूचना अनुसार भदौ २४ देखि २६ गतेसम्म विद्यालय बन्द रहनेछ।
महानगरले राजधानीमा भइरहेको जेनजी आन्दोलन र त्यसका कारण सिर्जित असुरक्षित वातावरणलाई ध्यानमा राख्दै यो निर्णय गरेको हो। पछिल्ला दिनमा आन्दोलन व्यापक बन्दै गएको र प्रहरी–प्रदर्शनकारीबीच झडप बढिरहेको अवस्थालाई मध्यनजर गर्दै विद्यालय बन्द गर्ने निर्णय गरिएको महानगरले जनाएको छ।
महानगरको विज्ञप्तिमा भनिएको छ, “विद्यार्थीहरूको सुरक्षा सर्वोपरि हो। हालको असामान्य परिस्थितिमा विद्यालय सञ्चालन गर्न सकिने अवस्था नरहेकाले अस्थायी रूपमा विद्यालय बन्द गर्ने निर्णय गरिएको छ।”
काठमाडौं उपत्यकामा भइरहेको आन्दोलनका कारण जनजीवन प्रभावित बनेको छ। सार्वजनिक यातायात आंशिक रूपमा ठप्प भएको छ भने धेरै ठाउँमा सुरक्षा सतर्कता कडा पारिएको छ। विद्यालय बन्द गर्ने निर्णयसँगै अभिभावकहरूले आफ्ना बालबालिकाको सुरक्षाबारे केही हदसम्म सहज महसुस गर्ने अपेक्षा गरिएको छ।
शिक्षक महासङ्घ र निजी विद्यालय सङ्घ (प्याब्सन) ले पनि विद्यार्थीहरूको सुरक्षालाई ध्यानमा राख्दै विद्यालय सञ्चालन असजिलो भएको बताएका छन्। उनीहरूले आन्दोलन चाँडै शान्तिपूर्ण रूपमा समाधान गर्न सरकारसँग आग्रह गरेका छन्।
उता, विद्यार्थी तथा अभिभावकहरूले भने विद्यालय बन्द हुनु बाध्यतापूर्ण भए पनि शैक्षिक सत्रमा असर पर्ने चिन्ता व्यक्त गरेका छन्। “पढाइमा बाधा पुगे पनि सुरक्षा पहिलो प्राथमिकता हो,” एक अभिभावकले भने।
जेनजी आन्दोलनले देशभर ठूलो प्रभाव पारेको छ। काठमाडौंलगायत विभिन्न शहरमा भएका भिडन्तमा अहिले सम्म १९ जनाको मृत्यु भइसकेको छ भने ३४७ जना घाइते भएका छन्। आन्दोलन नियन्त्रणका क्रममा प्रहरीको बलप्रयोग तीव्र भएपछि परिस्थिति अझ जटिल बन्दै गएको छ।
सरकारले घटनाको छानबिनका लागि समिति गठन गर्ने घोषणा गरिसकेको भए पनि आन्दोलनकारी पक्षले तत्काल कारबाही र ठोस निर्णय माग गर्दै आन्दोलन जारी राखेका छन्। यस्तो अवस्थामा विद्यालय बन्दको निर्णयले राजधानीको सामान्य जनजीवन थप अस्तव्यस्त बनाएको छ।
