काठमाडौं । गृहमन्त्री रमेश लेखकले सोमबार साँझ आफ्नो पदबाट राजीनामा दिएका छन्। उनले मन्त्रिपरिषद्को नियमित बैठकमा प्रधानमन्त्री केपी शर्मा ओलीलाई राजीनामा पत्र बुझाएका हुन्। मन्त्री लेखकको नजिकका स्रोतका अनुसार उनले घटनापछि नैतिक जिम्मेवारी लिनुपर्ने भन्दै पदमा बसिरहनु उचित नदेखिएको बताएका थिए।
सोमबार राजधानी काठमाडौंसहित विभिन्न स्थानमा जेनजी (Gen Z) पुस्ताले आह्वान गरेको प्रदर्शन हिंसात्मक बनेको थियो। उक्त आन्दोलनका क्रममा प्रदर्शनकारी र सुरक्षा निकायबीच झडप हुँदा हालसम्म १९ जनाले ज्यान गुमाएका छन् भने धेरै जना घाइते भएका छन्। राजधानीमा निकै तनावपूर्ण अवस्था सिर्जना भएपछि सरकारले अतिरिक्त सुरक्षाकर्मी परिचालन गरेको थियो।
घटनापछि राजनीतिक वृत्तमा गृहमन्त्रीको भूमिकाबारे चर्को आलोचना भएको थियो। प्रदर्शन नियन्त्रणमा सरकारले पर्याप्त संवेदनशीलता नदेखाएको र बल प्रयोग अत्यधिक भएको भन्दै लेखकमाथि दबाब बढ्दै गएको थियो। यसैबीच सोमबार साँझ बसेको मन्त्रिपरिषद बैठकमा उनले आफ्नो जिम्मेवारी स्वीकार गर्दै पदत्याग गर्ने घोषणा गरे।
लेखकले पार्टी बैठकमै पनि आफू नैतिक कारणले पदमा बसिरहन नसक्ने स्पष्ट संकेत दिएका थिए। उनले भनेका छन्, “गृहमन्त्रीको हैसियतले देशमा भएको दुखदायी घटनाप्रति म नैतिक रूपमा जिम्मेवार ठान्छु। यस कारण अब म पदमा बसिरहन उचित ठान्दिनँ।”
उनको राजीनामा पछि प्रधानमन्त्री ओलीले मन्त्रिपरिषद बैठकमा संक्षिप्त टिप्पणी गर्दै सरकारका तर्फबाट घटनाप्रति दुःख प्रकट गरेका थिए। प्रधानमन्त्रीले मृतक परिवारलाई श्रद्धाञ्जलि अर्पण गर्दै घाइतेको उपचारमा कुनै कमी हुन नदिने प्रतिबद्धता व्यक्त गरेका छन्।
यस घटनापछि सत्ता गठबन्धनभित्र पनि तरंग आएको छ। सत्ता साझेदार दलका नेताहरूबीच अब गृह मन्त्रालय कसले सम्हाल्ने भन्नेबारे छलफल सुरु भएको बताइएको छ। विपक्षी दलहरूले भने घटनाको छानबिनका लागि उच्चस्तरीय आयोग गठन गर्नुपर्ने माग गरेका छन्।
जेनजी आन्दोलन भने अझै स्थिर भएको छैन। सामाजिक सञ्जालमार्फत फेरि पनि विरोध प्रदर्शन गर्ने आह्वान भइरहेका छन्। यसले निकट भविष्यमा राजनीतिक र सामाजिक अवस्था कस्तो हुने भन्नेबारे अनिश्चितता बढाएको छ।
