featured photo: Darpanpost

पर्वत / पर्वतको फलेबास नगरपालिकाले बिद्युत महसुल नतिर्ने ग्राहकको लाईन काट्न शुरु गरेको छ । फलेबास नगरपालिका वडा नं १ कार्किनेटामा चार दिन देखि महसुल नतिर्ने ग्राहकको लाईन काट्न शुरु गरेको हो । लामो समय देखि बिद्युत महसुल नतिरेका ग्राहकको लाईन काट्ने निर्णय गरेपछि वडा अध्यक्ष बाबुराम शर्माको नेतृत्वमा चार दिन देखि धेरै लाईन काटिएको छ । महसुल नतिर्ने कसैलाई पनि काखापाखा नगरि बिद्युतको लाईन काटिएको अध्यक्ष बाबुराम शर्माले बताए । ‘बिद्युत उपभोग गर्ने तर महसुल नतिरेको लामो समय भएकाले उपभोक्ता समितिको निर्णय अनुसार सबैको लाईन काटिएको हो’ उनले भने । अभियानका क्रममा वडामा बिद्युत महसुल नतिरेका सबै ग्राहकको लाईन काट्ने उनले जानकारी दिए ।
फलेबास नगरपालिकाको वडा नं १ कार्किनेतमा ४ सय ६५ घरधुरी रहेका छन । सामुदायिक बिद्युतीकरण मार्फत उपभोक्ताले श्रमदान गरि गाउँमा बिद्युत बालेका थिए । सामुदायिक बिद्युतीकरण भएको दशक भन्दा बढी भैसकेको छ । केही उपभोक्ताले समितिलाई अटेर गरेर बिद्युत महसुल तिर्न आनकानी गरेकाले लाईन नै काट्नु परेको वडा अध्यक्ष बाबुराम शर्माले बताए । बिद्युतको लाईन काटेपछि उपभोक्ताले धमाधम बक्यौता तिर्न थालेका छन । एकै दिन ६० हजार रुपैयाका दरमा बक्यौता समेत उठिरहेको छ । बिहान लाईन काटेपछि हातहातमै पैसा लिएर बुझाउन थालेका छन । ‘बिहान लाइन काटेपछि साँझ बक्यौता तिर्न थालेका छन’ उनले भने ‘लाईन काटेपछि जोड्दिनुपर्ने अवस्था आएको छ’ फलेबास नगरपालिकाले सबै वडामा बक्यौता उठाउन यसरी नै लाईन बन्द गर्ने योजना बनाएको नगरपालिका कार्यालयले जनाएको छ । नगरपालिकाका अधिकाँश वडामा सामुदायिक बिद्युतीकरणबाट बत्ती बलेको हो । अहिले महसुल नतिर्ने लगायतका समस्याले समिति आर्थिक संकटमा पर्दा मर्मतको काम समेत हुन सकेको छैन ।