featured photo: Darpanpost

पर्वत । पछिल्लो समयमा शिक्षकहरु आफ्नो पेशाप्रति मर्यादित हुन सकेका छैनन् । राजनीतिक दलको झण्डा र झोला बोकेका समाचारहरु धेरैनै आए । पर्वत जिल्ला पनि यस विषयमा अछुतो भने छैन । विद्यालय, विद्यार्थीको भविष्यमाथिनै खेलवाड गर्नको लागि यहाँका शिक्षकहरुलाई कुनै आइतबार कुर्नु पर्दैन । मन लागे विद्यालय खुल्छ शिक्षकलाई विहे वा भोजमा जानु पर्यो भने विद्यालय बन्द हुन्छ । यस्तै भएको छ फलेवास नगरपालिका ३ शंकरपोखरीमा रहेको जनसहयोगी माविमा ।जनसहयोगी माविका प्रधानाध्यापक गणेशबहादुर थापा विद्यालयनै बन्द गरी विहेमा जन्ती बनेर सहभागी बनेका छन् । सयौ विद्यार्थीको भविष्यमाथि खेलवाड गर्दै उनी विद्यालयलाई बन्द गर्दै विहेमा जन्ती गएको स्थानीयबासीले बताएका छन् ।फलेवास नगरपालिका ३ शंकरपोखरीमा रहेका जनसहयोगी मावि, महादेव प्रावि, त्रिभुवन मावि बन्दनै गरेर शिक्षकहरु काँग्रेस नेताको छोराको भोज खान विहेमा सरिक भएका हुन् ।
स्थानीय नेता नेपाली काँग्रेसबाट फलेवास नगरपालिकामा मेयरका उम्मेदवार बनेका गंगाधर तिवारीको छोराका विहेमा जनसहयोगी माविका प्रअ विद्यालयनै बन्द गरेर सरिक भएका हुन् । पेशाप्रति निष्ठान, मर्यादित हुनुपर्नेमा उनी गैरजिम्मेवारी भएर एसइइ परिक्षाको तयारी गरिरहेका विद्यार्थीको भविष्यमाथि खेलवाड गर्दै विहेमा सहभागी भएका हुन् ।विद्यालयका प्रअ गणेबहादुर थापाले विद्यालय बन्द गरेको स्वीकार गरेका छन् । उनले विद्यालय व्यवस्थापन समितिसँगै छलफल गरेर विदा रोखेको बताएका छन् । उनले विद्यालयमा आधा भन्दा कम शिक्षक आउने स्थीति देखिएकाले एक दिनको लागि विद्यालय बन्द गरेको तर अबका दिनमा भने विद्यालय बन्द नगर्ने उनले बताए ।
फलेवास नगरपालिकाका मेयर पदमपाणी शर्माले त्यसवारेमा आफूले पूर्णरुपमा बुझन नपाएको संक्षिप्त जानकारी दिए ।