featured photo: Darpanpost

२२ माघ , नवलपरासी ।

पश्चिम नवलपरासीको जिल्ला सदरमुकाम परासीमा औद्योगिक व्यापार मेलाको आयोजना गरिएको छ।उद्योग वाणिज्य संघ नवलपरासीको आयोजनामा हुने मेला फागुन १६ देखि २७ गतेसम्म सञ्चालन हुने छ । मेलाबारे जानकारी दिन सोमबार परासीमा आयोजित पत्रकार सम्मेलनमा संघका कार्यबहाक अध्यक्ष ओमप्रकाश अग्रहरीले नवलपरासीमा उत्पादित वस्तुहरुलाई राष्ट्रिय तथा अन्तर्रा्ष्ट्रिय स्तरमा पहिचान गराउनका लागि मेला आयोजना गरिएको जानकारी दिए । मेलाले औद्योगिक करिडोरको रुपमा विकासहुँदै गएको यस क्षेत्रलाई समेत पहिचान गराउने र साना तथा ठूला उद्योग स्थापनामा प्रोत्साहन गर्ने विश्वास लिइएको अग्रहरीले बताए । मेलामा सूचना प्रविधि, कृषि उपज घरेलु हस्तकला, मनोरञ्जन, लघु उद्यम, कृषि प्रदर्शनी, अटोमोबाइल, सांस्कृति पहिचान झल्काउने भेषभूषालगायतको प्रर्दशनी रहने उपाध्यक्ष नगेन्द्र अग्रहरीले बताए । २ सय बढी स्टल रहने मेलामा ७ करोड बराबरको आर्थिक कारोबार हुने लक्ष्य राखिएको महासचिव गिरीराज पाण्डेले जानकारी दिए । मेलामा ३ लाख दर्शकले अवलोकन गर्ने अपेक्षा लिइएको छ। मेलालाई व्यवस्थित गराउन विभिन्न समिति र उपसमितिहरु गठन गरेर कामको जिम्मेवारी दिइएको संघले जनाएको छ ।