मनजित चौधरी, तिलोत्तमा । १४ असोज । राष्ट्रिय जनमुक्ति पार्टी तिलोत्तमा नगर समितिको शुक्रबार तिलोत्तमा नगरपालिका वडा नं. ०९ स्थित कबिराज भवनमा नियमित मासिक बैठक सम्पन्न भएको छ ।

बैठकको विषयवस्तुमाथि प्रकाश पार्दै नगर अध्यक्ष भोम बहादुर बुढा मगरले ठुला भनाउँदा दलहरु सबै जनताको आँखामा छारो हाल्ने पार्टी रहेको आरोप लगाउँदै जनमुक्ति मात्रै देशकै सच्चा र इमान्दार पार्टी भएको दाबी गर्नुभयो । बैठकलाई सम्बोधन गर्दै पार्टीका संघीय महासभा सदस्य एवं मगरहाङ्गका केन्द्रीय अध्यक्ष छत्र दर्लामीले सबै जाति, वर्ग र समुदायलाई निर्वाचन आयोगको निर्देशनानुसार कलस्टर मिलाएर आयोगमा दर्ता गर्न जनमुक्ति पार्टी मात्र सफल भएको दाबी गर्नुभयो । उहाँले आगामी प्रदेश तथा प्रतिनिधिसभाको निर्वाचनमा पार्टीलाई जिताउन स्थानीय तहबाटै पार्टीका नेता तथा कार्यकर्ताहरु सशक्त रुपमा लाग्न आह्वान समेत गर्नुभयो ।

त्यस्तै पार्टीको भातृसङ्गठन राष्ट्रिय भूतपूर्व सैनिक संगठनका केन्द्रीय बरिष्ठ उपाध्यक्ष बल बहादुर थापा मगरले ठूला पार्टीलाई भोट दिएर न पहिचान न अधिकार पाएको बताउँदै जनमुक्तिको नेपालका १ सय २५ जातिलाई समान अधिकार र जातीय जनसंख्याको आधारमा समानुपातिक प्रतिनिधित्व हुनुपर्ने अडान रहेको कुरा जनतालाई बुझाउनुपर्ने जिकिर गर्नुभयो । पार्टीका लुम्बिनी प्रदेश उपाध्यक्ष हरिओम बिकले दलाल नेता र राजनीतिक दलहरुले राष्ट्र र राष्ट्रियताप्रति गद्दारी गरेको आरोप लगाउँदै अब जनमुक्तिले जनताको माँझमा गई आफ्नो विचार र सिद्धान्त जनतालाई बुझाउन सके पार्टी सत्तामा पुग्न धेरै समय पर्खनु नपर्ने जिकीर गर्नुभयो ।

बैठकमा नेपाल थारु राष्ट्रिय मञ्चका केन्द्रीय अध्यक्ष रेखाप्रसाद चौधरी, पार्टी जिल्ला अध्यक्ष प्रेम बहादुर थापा मगर लगायतको उपस्थिति रहेको थियो । नगरको नियमित बैठकको अवसरमा तिलोत्तमा नगरपालिका वडा नं. १७ निवासी बृजमोहन चौधरीले पार्टी प्रवेश गर्नुभएको छ । चौधरीलाई नगर अध्यक्ष भोम बहादुर बुढाद्वारा खादा ओढाई सम्मान गरिएको थियो भने पार्टीका संघीय महासभा सदस्य छत्र दर्लामीले सदस्यता प्रदान गर्नुभएको थियो ।

बैठक नगर अध्यक्ष भोम बहादुर बुढा मगरको अध्यक्षता र सचिव प्रेम कनौजे मगरको संचालनमा सम्पन्न भएको थियो ।!