featured photo: Darpanpost

पर्वत ; लोक तथा दोहोरी गायक विमलराज क्षेत्रीले नेपाली कांग्रेसको जारी १४ औँ महाधिवेशनमा केन्द्रीय सदस्य पदमा उम्मेदवारी दिनुहुने भएको छ।

पर्वत बाट खुल्ला महाधिवेशन प्रतिनिधिमा निर्वाचित क्षेत्रीले लोक सांस्कृतिक क्षेत्रको सम्मान र प्रतिनिधित्वका लागि आफू केन्द्रीय सदस्यको उम्मेदवार रहेको बताउनुभयो ।

कलाकारले राजनीति गरेको प्रसंग बारे बताउँदै उहाले राजनीति देशको नीति भए पनि नेपालमा भइरहेको राजनीतिक अस्थिरताले शब्द लाई नै गलत रूपमा बुझाएको तर्क गर्नुभयो ।

पर्वतको फलेवास नगरपालिका–१० कुर्घा स्थित घर भएका क्षेत्री विद्यार्थी जीवनमा नेपाल विद्यार्थी संघमा आबद्ध भई कांग्रेसको राजनीतिमा सक्रिय रहँदै आउनुभएको थियो ।

विद्यार्थी जीवन बाटै कलाकारितामा प्रवेश गरेका उहा सबैभन्दा पहिले २०५० सालमा आफू अध्ययनरत गाउँकै विद्यालयमा नेविसंघको सचिव भई काम गर्नुभएको थियो । त्यसपछि २०५३ सालमा फलेवासमा रहेको पर्वत बहुमुखी क्याम्पसमा नेविसंघको सचिव बन्नुभएको थियो भने २०५६ मा जय नेपाल सांस्कृतिक प्रतिष्ठानको केन्द्रीय सदस्य, २०६८ मा नेपाल कलाकर्मी संघको उपमहासचिव, २०७० मा नेपाल ट्रेड युनियन कांग्रेसको केन्द्रीय सदस्य, २०७४ मा लोकतान्त्रिक लोकदोहोरी संघका संस्थापक सभापति बन्नुभएको थियो । ।
क्षेत्रीले गाएका बल्लै भो भेट, सुपारी चाम्रो, रानीघाटैमा, मधुवनैमा, जापान टोकियो लगायत कैयौँ गीतहरू चलेका गीतमा पर्छन्।
उहाले नेविसंघ, ट्रेड युनियन कांग्रेस र नेपाली कांग्रेस सम्बन्धी गीतहरु पनि गाउनुभएको छ । सुन सुन साथी, वीपी सम्झेर , कांग्रेसको सिपाही लगायतका पार्टी गीतहरु क्षेत्रीले गाउनुभएको छ ।