About Contact
२१ जेठ २०७७, बुधबार
Close
बिज्ञापन
स्वदेशमै दिल खोलेर लगानी गर्ने वातावरण बनाउन आवश्यक : प्रचण्ड

Darpanpost बिहिबार, आश्विन ०९, २०७६ मा प्रकाशित

featured photo: Darpanpost

 

बुटवल ,असोज ९ / पूर्व प्रधानमन्त्री एवं नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ले स्वदेशी लगानीकर्तालाई स्वदेशमै दिल खोलेर लगानी गर्ने वातावरण बनाउन आवश्यक रहेको जानकारी दिनुभएको छ ।

रुपन्देहीको तिलोत्तमा नगरपालिकाले आयोजना गरेको तिलोत्तमा लगानी सम्मेलन २०७६ को आज उद्घाटन गर्नुहुँदै अध्यक्ष दाहालले सरकारले नीति कार्यक्रम बनाउँदा लगानीमैत्री वातावरण निर्माणको विषयलाई महत्व दिएको बताउनुभयो ।

अध्यक्ष दाहालले विदेशी लगानी कर्तालाई लगानीको लागि विश्वासको वातावरण बनाउन ऐनकानूनमा सुधार गर्दै स्वदेशी लगानीकर्ता आकर्षित गर्ने खालका योजना बनाउन स्थानीय तहलाई समेत आग्रह गर्नुभएको छ । उहाँले राष्ट्रिय पूँजीलाई प्रोत्साहन र दलाल पूँजीलाई नियन्त्रण गर्ने कुरामा सरकार गम्भीर रहेको र बजेटसम्बन्धी सैद्धान्तिक पक्षमा छलफल गरेर खरीद ऐनलाई सरलीकरण गर्नेतर्फ ध्यान दिइएको जानकारी दिनुभएको छ ।
उहाँले प्रदेश नं– ५ मा पर्यटन विकासको ठूलो आधार रहेकाले पर्यटन पूर्वाधारको काममा ध्यान दिन सुझाव दिँदै भन्नुभयो–“गौतमबुद्धको जन्मभूमि भएका कारण यो क्षेत्रमा पर्यटनको प्रचुर सम्भावना छ ।”

अध्यक्ष दाहालले नेपाली जनताले अपेक्षा गरे अनुसारका काम अझै हुन नसकेकाले हाम्रो सोच र शैलीमा परिवर्तन आवश्यक रहेको विचार व्यक्त गर्नुभयो ।
उहाँले हिजो जेलनेल भोगेका व्यक्ति आज सत्तामा पुग्दा जनताका अप्ठ्यारा विर्सने परिस्थितिको अन्त्य हुनुपर्नेमा जोड दिनुभयो । “२५० वर्ष लामो तानशाही र निरङ्कुताले जर्जर बनाएको समाजलाई डेढवर्षमै चमत्कार हुनुपर्छ भनेर सोच्ने मानसिकतालाई म केही भन्दिन, तर यतिका वर्षको फोहर सफा गर्न समय लाग्छ ।” उहाँले भन्नुभयो । अध्यक्ष दाहालले स्थानीय तहले इमान्दारीताका साथ काम नगरे सङ्घीयता ल्याउनेमाथि प्रहार हुने भएकाले यसप्रति सचेत हुन उहाँले आग्रह गर्नुभयो । “जनताप्रति जिम्मेवार र जवाफदेही भएर स्थानीय तह ठिक भन्ने सन्देश देशभर जानुपर्छ, अनिमात्रै मुलुकमा गणतन्त्र ल्याउन ज्यान गुमाउने शहिदहरुको सपना साकार हुन्छ ।” उहाँले भन्नुभयो । कार्यक्रममा प्रदेश नं ५ का मुख्यमन्त्री शङ्कर पोखरेलले प्रदेशमा लगानीको वातावरण अनुकूल बन्दै गएकाले ढुक्क भएर लगानी गर्न आह्वान गर्नुभयो । ‘लगानीका लागि यो ठाउँ प्रतिफलयुक्त छ, ढुक्क भएर लगानी गर्नुस् ।’ उहाँले भन्नुभयो ।

प्रदेशको समृद्धिका लागि प्रदेश सरकार प्रयत्नशील रहेको बताउँदै उहाँले अन्य प्रदेशको तुलनामा यस प्रदेशले ७ दशमलब १ प्रतिशतको आर्थिक वृद्धिदर हासिल गर्नु राम्रो शुरुवात भएको बताउनुभयो ।
मुख्यमन्त्री पोखरेलले तिलोत्तमा नगरपालिकाको लगानी सम्मेलन सफल बनाउन प्रदेशको दह्रोसाथ रहेको बताउनुभयो । नेपाल सरकारका अर्थमन्त्री डा युवराज खतिवडाले नगरको विकास र समृद्धिका लागि निजी क्षेत्रसँग सहकार्य गरेर अघि बढ्न सुझाव दिनुभयो । उहाँले नगरको आर्थिक विकासका लागि निजी क्षेत्रसँग सहकार्य र परिपुरकको प्रक्रिया अगाडि बढाएर समृद्धिको यात्रा तय गर्न आग्रह गर्नुभयो ।
उहाँले स्थानीय तहमा भूउपयोग नीति बनाउनसमेत सुझाव दिनुभयो । सार्वजनिक यातायातको व्यवस्थाका लागि तिलोत्तमा नगरसँगै अन्य नगरलाई जोडेर सरकारले मेगा सिटीको अवधारणा अगाडि बढाएको भन्दै यो योजना पूरा गर्नेतर्फ ध्यान दिन आग्रह गर्नुभयो । प्रदेश नं ३ का मुख्यमन्त्री डोरमणि पौडेलले लगानीलाई उत्साहजनक ढङ्गले अगाडि बढाउन नसकिएको धारणा राख्नुभयो । ‘लगानीकर्ता जुन उत्साहपूर्ण तरिकाले आउनुपर्ने हो आएका छैनन् ,प्रतिफल नपाई कसैले लगानी गर्दैन, लगानीमैत्री वातावरणका लागि नीति अलि खुकुलो बनाउन जरुरी छ ।’ उहाँले भन्नुभयो ।

नेपाल कम्युनिष्ट पार्टी ९नेकपा० का महासचिव विष्णुप्रसाद पौडेलले मुलुकमा लगानीमैत्री वातावरण बन्दै गएकाले ढुक्क भएर लगानी गर्न लगानीकर्तालाई आह्वान गर्नुभयो । उहाँले नेकपा नेतृत्वको सरकार लगानीका लागि अनुकूल परिस्थिति निर्माण गर्न तयार रहेको भन्दै आत्मविश्वासका साथ लगानी गर्न आग्रह गर्नुभयो ।
महासचिव पौडेलले शैक्षिक हबको रुपमा परिचय बनाएको रुपन्देहीमा लगानीको प्रचुर सम्भावना रहेको समेत बताउँदै भन्नुभयो,“प्रचलित कानूनको सिमाभित्र रहेर लगानी गर्नुस, नाफा कमाउनुस यहाँको लगानी संरक्षणमा गर्न हाम्रो साथ छ, यो नगर, जिल्लाका जनता र जनप्रनिधि त्यसका लागि विश्वास दिलाउन चाहान्छु ।” प्रतिनिधिसभाका सदस्य तथा नेपाली काङ्ग्रेसका सचेतक बालकृष्ण खाँणले लगानी सम्मेलन सफल बनाउनु सबै दलको दायित्व भएको बताउनुभयो । तिलोत्तमा नगर सडक सञ्जालले जोडिएका कारण यहाँ उत्पादित वस्तु तथा सामग्री जुनसुकै स्थानमा पु¥याउन सहज हुने धारणा राख्नुभयो । उहाँले लगानीकर्ताको सुरक्षाको दायित्व सरकारको भएकाले लगानीमैत्री वातवरण बनाएर सुरक्षा प्रदाान गर्न जरुरी रहेको बताउनुभयो । नेता खाँणले पानीको पर्याप्त आपूर्ति गर्न समस्या भएकाले कालीगण्डकी तिनाउ डाईभर्सनको प्रक्रिया सरकारले अगाडि बढाएकाले यसलाई पूर्णता दिनुपर्ने जानकारी दिनुभएको छ ।

प्रतिनिधिसभाका सदस्य घनश्याम भुसालले मुलुकको समृद्धिका लागि वैदेशिक लगानी आवश्यक रहेको बताउनुभयो । उहाँले विधि र प्रक्रियाका हिसाबले सुरक्षाको ग्यारेन्टी गर्न आवश्यक भए पनि त्यसका लागि सरकार तयार रहेको जानकारी दिनुभएको छ । उहाँले भन्नुभयो,“सरकारले लगानीकर्ता र श्रमिकबीच मध्यस्थकर्ताको भूमिका निभाउनुपर्छ, यो आवश्यक छ ।” नेता भुषालले लगानीका हिसाबले तिलोत्तमा उपयुक्त स्थान भएकाले ढुक्क भएर लगानी गर्न लगानीकर्तालाई आग्रह गर्नुभयो । तिलोत्तमा नगरपालिकाका प्रमुख वासुदेव घिमिरेले लगानी सम्मेलन तिलोत्तमा नगरपालिकाको मात्र नभइ देशको समृद्धिको लागि महत्वपूर्ण हुने बताउनुभयो । उहाँले नगरमा सुरक्षाको अवस्थासमेत मजबुत रहेकाले निर्धक्क भएर लगानी गर्न लगानीकर्तालाई आह्वान गर्नुभयो । सम्मेलनमा स्वदेशी निजी क्षेत्रका लगानीकर्ता, विदेशी लगानीकर्ता, विदेशी कुटनीतिक नियोगका प्रतिनिधि, सङ्घीय सरकार मन्त्री, प्रदेश सरकारका मुख्यमन्त्री तथा सरकारका उच्च पदस्थ अधिकारीलगायत ८०० बढीको सहभागिता रहेको आयोजक तिलोत्तमा नगरपालिकाका प्रवक्ता सुरेन्द्र श्रीले जानकारी दिनुभयो । उद्घाटनपछि तिलोत्तमा नगरपालिका क्षेत्रमा लगानीको सम्भावना, अवसर, चुनौतीलगायतका विषयमा विशेषज्ञबाट छलफल हुनेसमेत उहाँले बताउनुभएको छ ।

तपाईको प्रतिक्रिया के छ ?

सम्बन्धित

ताजा अपडेट
आजको राशिफल : वि.सं.२०७७ साल जेठ २१ गते । बुधबार । ईश्वी सन् २०२० जुन ०३ तारिख
मदाने गाउँपालिकाले कोभिड विशेष कृषि कार्यक्रम संचालन गर्दै

हाम्रो बारेमा

दर्पण पोष्ट समाजको दर्पण बनाउने .उद्देश्यले शिखा मिडिया प्रा.लिले संञ्चालनमा ल्याएको नेपाली भाषाको डिजिटल पत्रिका हो । समाजमा घट्ने विभिन्न घटना परीघटनाहरुलाई निपक्ष हिसाबले पाठक समक्ष पुर्याउन हामी प्रतिवद्ध छौँ । नेपालको विभिन्न स्थानमा भएका हाम्रा संवाददाताहरुको माध्यमबाट समाचारलाई यथासिघ्र सहज र सजिलो माध्यमबाट प्रवाहा गर्नु हाम्रो प्रमुख उद्देश्य हो । तपाइको साथ सहयोग र प्रतिक्रियाको सधैँ अपेक्षा राख्दछौँ । हामीले प्रकाशन गरेका समाचार, लेख रचना प्रति तपाइको कुनै टिप्पणी छ भने कृपया जुन सुकै माध्यमबाट हामीलाई सम्प्रेशण गरीदिनुहुन विनम्र अनुरोध गर्दछौँ ।

दर्ता विवरण

    सूचना विभाग दर्ता नंः १२३२/०७५–७६
    प्रधान सम्पादक –टंक सुनार
    प्रवन्ध निर्देशक–विमल भट्टराई

 

Address

Official Contact
Shikha Media Pvt.Ltd.
Sunwal-1, Nawalparasi, Province No. 5, Nepal
Contact No : 9857046569
Email :- [email protected]
:- [email protected]
Web :- www.darpanpost.com