featured photo: Darpanpost

प्युठान । प्युठानमा विद्युत प्राधिकरणका कर्मचारीको लापरवाहीका कारण एक महिलाको करेन्ट लागेर मृत्यु भएको छ । प्युठान नगरपालिका ९, सिमलगैरा महिलाको मृत्यु भएको हो । बुधवार दिउँसो घाँस काट्ने क्रममा बाँसको रुखमा चढेका बेला रुखले विद्युतको तार छुँदा स्थानीय निशा भण्डारीेको मृत्यु भएको हो। ठूलो भोल्टेजको करेन्टले उनलाई रुखमै आगो लागेको हो । भण्डारीको रुखमै जलेर मृत्यु भयो ।

मृतककी सासु पुतला भण्डारीले तीन दिन पहिले विद्युत लाइन मर्मतका लागि आएका नेपाल विद्युत प्राधिकरण प्युठानका कर्मचारीलाई उक्त रुख हटाइदिन आग्रह गरे पनि उनीहरुले अटेर गरेको बताइन् । प्राधिकरण प्युठानका प्रमुख रमेश बञ्जाडे महिलाको मृत्यु भइसकेपछि पनि घटनास्थल सम्म पुगेका छैनन् । उनी स्थानियलाई प्राविधिक कारण हो भनेर पन्छिन खोजेपछि स्थानिय आक्रोशित भएका छन् । विद्युतका प्रमुखले माथिल्लो निकायसम्म जाहेर गर्ने काममा समेत पहल गर्न आनाकानी गरेको मृतकका परिवारको भनाइ छ।

घटनापछि प्रमुख जिल्ला अधिकारी बद्रीनाथ गैरे, प्युठान नगरपालिकाकी उपमेयर शान्ता आचार्य, वडा नम्बर ८, ९ र १० का वडाध्यक्षहरु घटनास्थल पुगेर घटनावारे जानकारी लिएका छन् । विद्युत प्राधिकरणसँग मृतकका परिवारलाई आवश्यक क्षतिपूर्ति उपलब्ध गराउन माग राख्दा प्राधिकरणले आनाकानी गरेपछि स्थानिय आन्दोलित भएका छन् । महिलाको शव अझै रुखमा झुण्डिएको अवस्थामा छ ।

स्थानियले विद्युत प्राधिकरणका कर्मचारीले माफी माग्नु पर्ने, नाबालक छोराको लालनपालन, शिक्षादिक्षा र रोजगरीको जिम्मा लिनुपर्ने माग राखेका छन् ।