featured photo: Darpanpost

सोलुखुम्बु । नेपाल कम्युनिष्ट पार्टी परित्याग गरि संघीय समाजवादी फोरममा प्रवेश गरेका छन् । पार्टीप्रति चरम असन्तुष्टि व्यक्त गर्दै दर्जनौ बढी जिम्मेवार कार्यकर्ताले पार्टी परिवर्तन गरेका छन्।

उनीहरुले लिखित वक्तव्य जारी गर्दै विगत लामो समयदेखि पूर्व नेकपा एमालेमा निष्ठापूर्वक काम गरेको जानकारी गराउँदै हाल बाम गठबन्धनले बहुमत प्राप्त गरी पार्टी एकतासम्म आइपुग्दा सम्म पार्टीले जनता सामु गरेका बाचा पूरा नगरी भ्रष्टचारलाई बढवा दिदैँ राज्यको ढुकुटी रित्याउने काम गर्दै आएकाले आफुहरु पार्टीका नेता देखि सन्तोषजनक नभएको बताएका छन् ।

उनीहरुले पूरै तानाशाही र राणाशासनको जस्तो पद्धतीबाट शासन चलाएको, पार्टीभित्र अनुशासनहीनता मौलाएको, स्थानीय तहमा प्राप्त बजेट नातावाद र कृपावादका रुपमा कोठे बैठक बसी विनयोजन गर्ने गरिएको, राजनीतिमा गुट उपगुटको संस्कार झाङ्गिदै असल कार्यकर्तालाई पाखा लगाइएको, जनप्रतिनिधिका रुपमा जितेकाले चरम अहमता प्रस्तुत गरी कार्यकर्तालाई कागजी घोडाको साक्षीका रुपमा मात्र प्रयोग गरेको जस्ता आरोप लगाउँदै पार्टी परित्याग गरेको घोषणा गरेका छन् ।

पार्टी प्रवेश गर्नेहरुमा जिल्ला कमिटी सदस्य डबलसिं कार्की, लिखुपिके गाउँपालिकाका पूर्व गाउँ कमिटी अध्यक्ष छोङ्बा शेर्पा, पूर्व वडा अध्यक्ष गेल्बुछिरी शेर्पा, पूर्व नेकपा माओवादी केन्द्रका जिल्ला कमिटी सदस्य कल्ज्याङ शेर्पा लगायत विभिन्न जिम्मेवारीमा रहेका नेता कार्यकर्ता रहेको संघीय समाजबादी फोरमका केन्द्रिय सदस्य तथा सोलुखुम्बु जिल्ला इन्चार्ज लाक्पा शेर्पाले जानकारी दिनुभयो ।

संघीय समाजवादी फोरम मात्रै अबको वैकल्पिक राजनीतिक पार्टी भएको र सबै जाति, वर्ग मिलेको समतामुलुक समाज निर्माण गर्न सकेको खण्डमा मात्रै नेपालको समृद्धी संभव रहेको भन्दै गाउँगाउँमा सिहंदरबार भनिएपनि गाउँमा सिंहहरुको मात्रै बिगबिगी बढेकाले संघीयतालाई संस्थागत गर्न समाजवादी फोरम मात्रै एक विकल्प रहेकोले लामो समय संघर्ष गरेको पार्टी परित्याग गरी नयाँ विचार, सिद्धान्तसहितको पार्टीमा प्रवेश गरेको नेता डबलबहादुर कार्कीले बताउनयो ।