featured photo: Darpanpost

रसुवा । नयाँ शक्ति पार्टी फेरी फुटको संघारमा पुगेको छ । पटक-पटक फुट र विभाजनको क्षेती व्यहोर्दै आएको पार्टीका केन्द्रीय सदस्य तथा प्रदेश सांसद प्रेम तामाङको समूह नेपाली कांग्रेस प्रवेश गर्ने तथ्य बाहिरिएको छ ।

रसुवाबाट प्रदेश सभामा निर्वाचित नेता तामाङ र  केहि कार्यकर्ता कांग्रेस प्रवेश गर्ने तयारीमा रहेको एक जिल्ला नेताले पुष्टि गरे । नाम उल्लेख नगर्ने सर्तमा उनले छिट्टै नै एउटा समूह कांग्रेसमा मिल्ने बताए ।

माघ ३ गते घुम्ती बजारमा तामांग समूहको बैठक बसी कांग्रेस प्रवेशको तयारीलाइ अन्तिम रुप दिइएको तामाङ निकट ती नेताले नयाँ प्रवाहलाई बताए । यद्यपी उक्त बैठकमा पार्टीका जिल्ला संयोजक दावा तामाङ लगायत बहुमत सदस्य उपस्थित नभएको उनले जानकारी दिए ।

जिल्लामा नयाँ शक्तिको बलियो क्षेत्रका रुपमा चिनिन्छ । गत निर्वाचनमा देशभर लज्जास्पद् पराजय भोगेको शक्तिले रसुवामा भने साख जोगाएको थियो । राजनीतिक वजारमा चलेको हल्ला सत्य भए र सांसद् तामाङ कांग्रेस प्रवेश गरे नयाँ शक्ति रसुवा कुन रुपमा रहला त्यो भने हेर्न बाकी नै छ ।