बुद्धि पुन,
सल्यान २९, पुस । कर्णाली प्रदेशकी भूमि ब्यबस्था, कृषि तथा सहकारी मन्त्री बिमला केसीले कर्णालीको गरिबी बेचेर खाने अधिकार कसैलाई नभएको बताउनु भएको छ । उहाँले बिगतमा कर्णालीका जनताको नाममा गरिबी बेचेर धेरैले खाएको बताउदैँ अब भने कर्णालीको गरिबी बेच्ने अधिकार कसैलाई नभएको बताउनु भएको हो ।
आज नेपाल पत्रकार महासंघ सल्यानले खलंगामा आयोजना गरेको पत्रकार सम्मेलनमा बोल्दै उहाँले भन्नुभयो ‘कर्णालीमा गरिबी छ, यहाँका जनता गरिब छन्, बेरोजगारीहरु पनि धेरै छन्, तर बिगतमा जसरी कर्णालीको गरिबी बेचेर अब खान पाईदैन् ।’ उहाँले कर्णाली प्रदेश सरकार सभ्य र बिकसित कर्णाली बनाउनको लागी अगाडी बढेको बताउनुभयो ।
कर्णाली प्रदेश सरकारकी प्रबक्ता समेत रहनु भएकी मन्त्री केसीले हरेक क्षेत्रको बिकासमा डुब्लीकेशन नहुने गरेर काम गर्ने बताउनुभयो । उहाँले कृषकहरुलाई कृर्षिमा आकृर्षित गर्न प्रदेश सरकारले अनुदान सहितका बिभिन्न कार्यक्रम सञ्चालन गरेको बताउनुभयो । उहाँले गरिब किसानहरुको लागी गरिब किसान हातेमालो कार्यक्रम सञ्चालन गर्न प्रदेश सरकारले बजेट नै बिनियोजन गरेको जानकारी दिनुभयो ।