मशिर १८ । बुटवलमा केन्द्रीय कार्यालय रहेको मिसन डेभलपमेन्ट बैंकले पश्चिम नवलपरासीको सदरमुकाम परासी बजारमा शाखा विस्तार गरेको छ । परासीमा आज एक समारोहकाबीच बैंकको शाखा शुभारम्भ गरिएको छ । यो बैंकको १९ औँ शाखा हो भने पश्चिम नवलपरासीमा पाँचौँ शाखा हो ।

बैंकका अध्यक्ष लिलबहादुर केसीको अध्यक्षता तथा रामग्राम नगर प्रमुख नरेन्द्रकुमार गुप्ताको प्रमुख आतिथ्यमा भएको सो कार्यक्रममा मेयर गुप्ताले मिसन बैंकको स्थापनाले नगरको विकासमा महत्वपूर्ण टेवा प्ुग्ने विश्वास व्यक्त गर्नुभयो । परासीमा बैंक स्थापना हुनु खुसीको कुरा भएको भन्दै उहाँले यस क्षेत्रका नागरिकको जीवनस्तर सुधारमा फलदायी हुने अपेक्षा व्यक्त गर्नुभयो ।

बैंकका अध्यक्ष लिलबहादुर केसीले बैंकीङ पहुँच नपुगेको नागरिकलाई बैंकको पहुँचमा पुराउने उद्देश्य अनुसार ग्रामीण क्षेत्रमा बैंकले शाखाहरु स्थापना गरेको बताउनुभयो । पश्चिम नवलपरासीको भूमही, सुनवल, गोपीगन्ज, महेशपुरमा पनि शाखा रहेको उहाँले जानकारी दिनुभयो ।

उद्योग वाणिज्य संघका अध्यक्ष केशव भण्डारीले बैंकको स्थापनाले जिल्लाको आर्थिक क्षेत्रको चलायमान र उद्योगी व्यवसायीलाई पनि सहज हुने विश्वास व्यक्त गर्नुभएको थियो । बैंकका कार्यकारी प्रमुख हरिप्रसाद घिमिरेका अनुसार मिसन बैंकको हाल रु ५३ करोड चुक्ता पूँजी, साढे चार अर्ब निक्षेप संकलन, ४ अर्ब लगानी रहेको छ । उत्पादनमूलक क्षेत्र र विपन्न वर्ग कर्जामा मिसन बैंकको उल्लेख्य योगदान रहेको प्रमुख घिमिरेले बताउनुभयो ।

बैंकका कर्जा विभाग प्रमुख विष्णुप्रसाद गौतमका अनुसार मिसन बैंकले जनरल बैंकीङ सेवा र लघुवित्त सेवा सन्चालन गरिरहेको छ । लघुवित्त क्षेत्रमा करिव ८० करोड रुपैँया लगानी रहेको गौतमले बताउनुभयो । नेपाल राष्ट्र बैंकबाट ख वर्गमा सूचिकृत यो बैंकले केही समयमै दाङ र अर्घाखाँची तथा निकट भविष्यमै प्रदेश नं ५ का सवै जिल्लामा कार्यक्षेत्र विस्तार गर्ने लक्ष्य लिएको जनाएको छ । हाल बैंकको रुपन्देही, नवलपरासी र कपिलवस्तु कार्यक्षेत्र रहेको मिसन डेभलपमेन्ट बैंक परासी शाखाका प्रमुख सुनिल कुमार उपाध्यायले जानकारी दिनुभयो ।