featured photo: Darpanpost

दिपेश विश्वकर्मा पर्वत, मंसिर १३ ।
पर्वतको महाशिला गाउँपालिकाले सुशासन र सेवामा सेवाग्राही एवं जनताको सहज पहुँच पुर्याउनका लागि मोबाइल एप्लिकेसन सेवा सुरु गरेको छ ।जनताको काम छिटो छरितो र गाउँपालिका बाट प्रदान गरिने सेवा सुविधाको बारेमा सबै खाले जनताले सहजै बुझ्न सकुन भन्ने उदेश्यका साथ यस्तो सेवा सुरु गरिएको गाउँपालिकाका प्रबक्ता एवं वडा न ५ लंखुका वडा अध्यक्ष जिवन उच्चै ठकुरीले बताउनुभयो ।

गाउँपालिकाबाट प्रवाह हुने समग्र सेवा , गतिविधि र सुचना लगायतका सम्पूर्ण जानकारी जनताले एप्लिकेसन मार्फत लिनसक्ने गरि यस किसिमको नयाँ नौलो प्रविधिको सुरुवात गरेको ठकुरीले बताउनुभयो । सेवाग्राहीले उक्त एप्लिकेसन आफ्नो स्मार्ट फोनमा प्ले स्टोरबाट डाउनलोड गरेर महाशिला गाउँपालिकाको सम्पूर्ण जानकारीहरु लिन सकिने उहाँले भन्नुभयो ।गाउँपालिकाको योजना , बजेट ,कर्मचारीहरुको विवरण , निर्णय,सुचन तथा बोलपत्र ,कर तथा शुल्क , गाउँपालिकाका प्रतिनिधिहरुको सम्पूर्ण विवरण , प्रवाह हुने सेवा लगायतका बारेमा यस एप्लिकेसन मार्फत हेर्न र पढ्न सकिने छ ।
नेपाल सरकारको अवधारणा अनुसार नै यस गाउँपालिकाको सेवालाई प्रविधि मैत्री बनाइएको हो ।यो सेवा सुरु भएदेखि गाउँपालिकाको गतिविधिहरुको बारेमा जानकारी लिन कार्यालयमा धाइरहनुपर्ने झन्झटबाट मुक्ति मिलेको स्थानीय सेवाग्राहीले बताए ।आवश्यक सुचना आफ्नै स्मार्ट मोबाइल फोनबाटै प्राप्त गर्न सकिने भएपछि सानोठुलो जानकारी लिनकै लागि अनावश्यक समय बर्बाद गर्नुपर्ने हैरानी दुर भएको स्थानीय गंगा बहादुर विश्वकर्माले बताए ।