featured photo: Darpanpost

नवलपुर, कात्तिक २८ ।

नवलपुरको मध्यविन्दु नगरपालिका –२, कोल्हुवामा जारि राइनो संरक्षण गोल्डकप फुटबल प्रतियोगिताको उपाधिका लागि नेपाल पुलिस क्लब र च्यासल युथ क्लब भिड्ने भएका छन् ।

आज(बुधबार) भएको दोस्रो तथा अन्तिम सेमिफाईनल खेलमा हिमालयन शेर्पा क्लबलाई ४–० गोल अन्तरले पराजित गर्दै च्यासलले पुलिससङ्गको उपाधी भिडन्त पक्का गरेको हो ।

पहिलो हाफको २२ औं मिनेटमा सन्जोग राईको गोलबाट अग्रता लिएको च्यासलले दोस्रो हाफमा ३ गोल ग‍र्याे । दोश्रो हाफको ७२ औं मिनेटमा बिमल घर्ती मगरले पेनाल्टी मार्फत च्यासलको अग्रता दोब्बर पारे । लगत्तै ७५ औं मिनेटमा विश्व अधिकारिले गोल गरे भने चौथो गोल ८१ औं मिनेटमा हेमन्त थापा मगरको नाममा रह्यो । खेलको म्यान अफ दि म्याच च्यासलका विश्व अधिकारिले नगद ५ हजार पुरस्कार प्राप्त गरे ।

फाइनल खेल भोलि(बिहिबार) दिनको १ः३० बजे हुने खेल संयोजक सेतमान पुनले जानकारी दिनुभयो । यसअघि हिजोको पहिलो सेमिफाईनलमा १–० उपहार गोलको सहयोगमा बिरगंज युथ एकेडेमीलाई पराजित गर्दै पुलिसले फाइनलमा स्थान पक्का गरेको थियो  ।

प्रतियोगितामा १२ टिमको सहभागिता रहेको थियो । प्रतियोगिताको उपाधी बिजेताले रु ४ लाख ९९ हजार ५५५ र दोस्रो हुने टिमले रु २ लाख ५५ हजार ५५५  मेडल, प्रमाण पत्र को साथै फाईनलमा पुग्ने २ टिम लाई म्याच मनि रु १ लाख रहेको मुल आयोजक समितिका अध्यक्ष दोमन बहादुर भण्डारीले जानकारि दिनुभयो ।