featured photo: Darpanpost

नवलपुर, १३ कात्तिक ।

पूर्वी नवलपरासी मध्यविन्दु १ सेतापानीमा रहेको शान्ति आधारभूत विद्यालयले गीता ज्ञान विज्ञान शैक्षिक महोत्सव तथा धनधान्याञ्चल ज्ञानमहायज्ञ आयोजना गर्ने भएको छ ।

यज्ञ मुल समारोह समितिले आज(मंगलबार) कावासोतीमा पत्रकार सम्मेलन गरि आगामि मंसिर ३ गतेबाट ११ गतेसम्म यज्ञ संचालन गर्न लागेको जानकारी गराएको हो । समाजमा रहेका अनाथ, असाहय र अति विपन्न परिवारका छोराछोरीहरुलाई आवासीय सेवा सुविधा सहित नि–शुल्क शिक्षा प्रदान गर्ने, विद्यालयको शैक्षिक सुधार र भौतिक पूर्वाधारको विकास गर्ने उद्देश्यले यज्ञ संचालन गर्न लागेको पत्रकार सम्मेलनमा विद्यालयका प्रधानाध्यापक दधिराम सापकोटाले जानकारी दिनुभयो ।

यज्ञबाट खर्च कटाएर करीब तीन करोड रुपैयाँ दान रकम संकलन हुने लक्ष्य राखिएको र करीब ३५ लाख रुपैयाँ खर्च लाग्ने अनुमान गरिएको सापकोटाले बताउनुभयो । जिल्लाका विभिन्न दानविर दाताहरुसंग आग्रह गरिएको र स्थानीय तहबाट समेत सहयोगको माग गरिएकाले लक्ष्य राखे बराबरको दान रकम संकलन गर्न सकिनेमा विश्वास रहेको सापकोटाले बताउनुभयो । त्यस्तै अनाथ, असाहय र अति विपन्न परिवारका छोराछोरीलाई लक्षित गरि धनधान्याञ्चल ज्ञानमहायज्ञ आयोजना गर्न लागीएको भन्दै यस ज्ञानमहायज्ञलाई सफल वनाउन महायज्ञ मुल समारोह समिती संयोजक सिद्धिमान खड्काले सवैले सहयोग गर्न आग्रह गर्नुभएको छ ।

यज्ञमा प्रमुख वाचकका रुपमा चैतन्य कृष्ण गुरु महाराज जी ले प्रवचन गर्नुहुनेछ । यज्ञको तयारी तिब्र पारिएको र प्रचार प्रसारलाई समेत प्राथमिकतामा राखेर काम भईरहेको प्रचार–प्रसार संयोजक धनेश्वर कुवँरले जानकारी दिनुभयो । १० हजार एक रुपैयाँ दान दिने दानदाताले आजिवन सदस्य वन्न सक्ने कुवँरले बताउनुभयो । यज्ञ सफल पार्न विभिन्न ३५ वटा उपसमिति गठन गरेर तयारी तिब्र पारिएको छ ।