featured photo: Darpanpost

कावासोती, कार्तिक ११ ।

जनकल्याण सामुदायिक बन उपभोक्ता समिती कावासोती–१ नवलपुरले गरेको आम्दानी खर्च विवरण सार्वजनिक गर्न उपभोक्ताहरुले माग गरेका छन् ।

आज(आइतबार) कावासोतीमा पत्रकार सम्मेलन गरि उपभोक्ताहरुले बन समिती एकलौटी रुपमा चलेको भन्दै उनीहरुले समितिबाट भए गरेका कामकारबाहीका विषयमा सत्यतथ्य सार्वजनिक गर्न माग गरेका हुन् । सूचना पाउने प्रत्येक नागरिकको अधिकार रहेकाले उपभोक्ताहरुले पटक–पटक सूचना माग गर्दा पनि समितिले बेवास्ता गरेको उपभोक्ता डोल राज गैरैले आरोप लगाउनुभएको छ ।

गैरेसहित ७ जनाले गत असोज ७ गते डिभिजन बन कार्यालय कावासोती र वडाकार्यालयमा सूचना उपलब्ध गराउन माग गरेपनी कुनै सुनुवाइ नभएको भन्दै पत्रकार सम्मेलन गर्नुपरेको उनीहरुको भनाई छ । बन कार्यसमितिले साधारण सभाको निर्णयबिना एकलौटी ढंगबाट चलेको समेत उपभोक्ताहरुको आरोप छ ।

उनीहरुले वार्षिक कार्यक्रम र बजेटबाट तय गरिएको कार्यक्रम नगरी साधारण सभाको निर्णय विपरीत अन्य शिर्षकमा छुट्याइएको बजेट कटौती गरि भवन निर्माणलाई मात्र प्राथमिकता दिई एउटै शिर्षकमा बढी रकम खर्च गरिएको आरोप लगाएका छन् । सामुदायिक बन उपभोक्ता समूह आर्थिक कार्य्बिधि निर्दे्शिका २०७३ विपरीत बन बिकासमा २५ प्रतिशत र लक्षितबर्गलाई छुट्याईने ३५ प्रतिशत रकम अन्यन्त्र शिर्षकमा रकमान्तर गर्न नपाईने भनी उल्लेख भएपनि त्यो विपरीत समिती गएको उनीहरुको भनाई छ ।

उपभोक्ताहरु गैरेसहित कमान सिङ सुस्लिङ, खगेश्वर भुसाल, अमर सिङ्ग बिक, भिम बहादुर अधिकारी, अमर बहादुर बिक, र चुरामनी चापागाईंद्वारा हस्ताक्षरीत बिज्ञप्तिमा सस्था पारदर्शिरुपमा अगाडी बढाउनुपर्ने माग समेत गरेका छन् ।