featured photo: Darpanpost

नवलपुर, ६ कात्तिक ।

विगत पाँच वर्ष अगाडि कावासोती नगरपालिका–१५ मा स्थापना भएको शिवबस्ती नवदुर्गा सामुदायिक पुस्तकालय ओझेलमा पर्दै गएको छ ।

पूर्वपश्चिम राजमार्गको डन्डाबाट करिब ८ किलोमिटर दक्षिण कावासोती नगरपालिका १५ मा पर्ने पुस्तकालयको आयस्रोत नहुँदा ओझेलमा परेको हो । केही वर्ष पहिले भीडभाड देखिने पुस्तकालय आजभोलि सुनसान जस्तै बनेको छ । रिड नेपालको सहयोगमा स्थापना भएको पुस्तकालयमा विभिन्न प्रकारका एक हजार ६०० थान पुस्तक राखिएको छ भने इन्टरनेट समेत जोडिएको छ ।

पुस्तकालयबाट प्रौढ शिक्षा, कम्प्युटर तालिम र विभिन्न बालमैत्री कार्यक्रमहरु गर्दै आइएको थियो । अहिले पुस्तकालयमा रहेका ६ वटा कम्प्युटर र २ वटा ल्यापटप बिग्रेका छन् भने नेटमा समेत समस्या देखिएको छ । पुस्तकालयमा फ्रि इन्टरनेट जडान गरेकाले युवा तथा महिलाहरु त्यहाँ जाने गरेका थिए ।

पुस्तकालयमा प्लम्बिड., कृषि सम्बन्धी तरिका जस्तै कुखुरा फार्म, बुङ्गुर पालन, माछा पालन , मौसमी र बेमौसमी तरकारी लगायत विदेशमा जादा उपयोगी हुने पुस्तक समेत राखिएको थियो । तर, अहिले केही पुस्तक धमिराले खाएको पुस्तकालयका अध्यक्ष गुनबहादुर थनैतले जानकारी दिएका छन् । कावासोती नगरपालिका वडा नं १५ का मात्र नभइ अन्य ठाउँका बालबालिका समेत पुस्तकालयमा जाने गरेको भए पनि उचित संरक्षण नहुँदा बिग्रिएका सामग्री सम्भार र मर्मत नभएका कारण विधार्थीलगायत अन्य व्यक्ति पुस्तकालयमा जान कमी भएको पुस्तकालयका अध्यक्ष थनेतले बताए ।