featured photo: Darpanpost

नवलपरासी, ५ कात्तिक ।

सुस्तापारिको भारतीय जंगलमा हुने निहुरोले दसैंमा देशभरिका मुख्य बजार ओगटेको छ । यहाँको जंगलमा प्रशस्तै पाइने निहुरोको माग दसैंमा अत्यधिक हुने गरेको छ । शाकाहारी हुन वा मांसहारी दसैंमा सागको माग बढी हुने भएपछि निहुरो सुस्तापारी भारतीय जंगलबाट ल्याइएको हो ।

भारतीयले दैनिक एक ट्रक निहुरो पारिपट्टिको भेडियारी नेपाली बजारका खरिदकर्तालाई दिन्छन । सुस्ताको निहुरोमा महिनाको लाखौं कमाउने बिचौलियाले सुस्तेली र भारतीयहरूसँग प्रतिमुठा ५ रुपैयामा खरिद गर्छन् र नेपाली बजारमा ५० रुपैयाँ प्रतिमुठामा बिक्री गर्छन् । सुस्ताको निहुरो भारतीय जंगलबाट टिपेर ट्रयाक्टरमा ल्याउँछन् । त्यहाँबाट नाउमा राखेर १७ सय मिटर लामो नारायणी तारेर नेपाली बजारमा लगिन्छ । नेपाली भूमि हुँदै सुस्ता आउजाउ गर्न नारायणी नतरी सुखै छैन । हिउँद बर्खा सधैंजसो निहुरोको माग अत्यधिक छ । नारायणी नदीवारि ल्याएपछि बिचौलियाको राज सुरु हुन्छ । हरेक साँझ एक ट्रक निहुरो नेपाली बजारमा लगिन्छ । काठमाडौं, बुटवल, पोखरा, नेपालगन्ज, नारायणगढको मुख्य तरकारी बजारमा यहाँको साग नै पुग्ने गर्दछ ।

ताजा र कुनै विषादी वा मलखाद नमिसाउने भएकाले त्यसको माग अत्यधिक रहेको छ । विषादी नमिसाउने र मल खाद्यको समेत प्रयोग नहुने भएकाले आर्गे्निक तरकारी (साग) का रूपमा बजारमा यसको माग सधंै एकनासको रहने स्थानीयको भनाई छ । भारतीयहरूले नखाने र सुस्तादेखि दक्षिण, पूर्व र उत्तरको भारतीय जंगलमा प्रशस्तै पाउने भएकाले यो बाह्रै महिना बिक्री हुने गरेको छ । वर्षादको समयको निहुरोमा जुकाले फुल पार्ने भएकाले स्वास्थ्यका लागि त्यति उपयुक्त नभए पनि त्यसको मागमा भने कहिल्यै कमी आउँदैन ।

फाइल तस्बीर :