featured photo: Darpanpost

काठमाडौं (हिटा) । नायक अनमोल केसीको मुख्य भूमिका रहने गरी चलचित्र ‘ए मेरो हजुर ३’को मुहूर्त गरिएको छ । अनमोलले अभिनेत्री तथा निर्देशक झरना थापाकी छोरी सुहाना थापासँग अभिनय गर्ने यो चलचित्रको शनिवार दिउँसो साढे ३ बजे पोखराको विन्दावासिनी मन्दिरमा शुभमुहूर्त गरिएको हो ।
यो भन्दा अघि ‘ए मेरो हजुर २’ निर्देशन गरेकी झरनाको निर्देशनमा बन्ने यो दोस्रो चलचित्र हुनेछ । सुनिल कुमार थापाको निर्माणमा बन्न लागेको यो चलचित्रको छायांकन केही हप्तामा सुरु हुने निर्देशक थापाले जानकारी दिइन् । नवनायिका सुहानाले पहिलो चलचित्रबाटै अनमोलसँग कामगर्न पाउँदा खुसी लागेको बताइन् । शनिबार पोखरामा अनमोल इभ इभेन्टमा चलचित्रको सानो अंशको सुटिङ गरियो । जहाँ अनमोल स्टेजमा भइरहँदा सुहाना पनि उक्त इभेन्ट हेर्न पुगेको दृश्य राखिएको छ । अन्य सुटिङ भने असोज ५ गतेबाट रेगुलर हुने बताइएको छ । चलचित्र प्रेमकथामै आधारीत हुनेछ ।
सुहाना इन्टरटेन्मेन्टको ब्यानरमा बन्न लागेको यो चलचित्रको प्रदर्शन मिति पनि तोकिएको छ । चलचित्र आउँदो चैत २९ गते प्रदर्शनमा आउने बताइएको छ ।