featured photo: Darpanpost

अमृत भट्टराई / २९ साउन, बुटवल ।  आज विप्लव नेतृत्वको नेकपाले गरेको बन्दका कारण देशैभर प्रभाव परेको छ । प्रदेश नम्बर ५ को राजधानी बुटवल बजारमा  पनि बिहानै  नेपाल बन्द को प्रभाव परेको छ । विभिन्न ठाउँमा बम विस्फोट पनि भइरहेको छ । एता बुटवलको बुटवलस्थित भारतीय पेन्सन क्याम्पमा शक्तिशाली बम विस्फोट भएको छ । बिस्फोटबाट क्याम्पको शौचालयमा क्षति पुगेको छ ।

इलाका प्रहरी कार्यालय बुटवलका डिएसपी डिल्लीवहादुर मल्लले घटनाको पुष्टि गरेका छन् । विस्फोटबाट मानवीय क्षति नभएको उनले बताए । विस्फोटको आवाज बुटवल बजारसम्म फैलिएको स्थानीयले बताएका छन् । डिएसपी मल्लका अनुसार विस्फोट कसले गराएको हो भन्ने बारे अनुसन्धान भइरहेको बताएका छन् ।
त्यसैगरी पाल्पाको दोभान प्रहरी चौकी नजिकै ट्याक्सीमाथि पेट्रोल बम प्रहार भएको छ भने तानसेन बजार बन्दले पुरै प्रभावित भएको छ ।

रुपन्देहीको सैनामैना चोकमा शंकास्पद बस्तु फेला परेको छ भने रामापुरमा बम प्रहार भएको छ । बेलवासको शिवालय चोकमा पश्चिमबाट आउदै गरेको ट्रकलाई लक्षित गरी बम प्रहार भएको छ । रुपन्देहीमा अहिलेसम्म ३ वटा गाडीमाथि आगजनी र बम प्रहार भएको छ । नवलपुरमा दुई वटा ट्रकमाथि बम प्रहार भएको छ । गुल्मीमा ४ स्थानमा मसाल जुलुस सम्पन्न भएको बताइएको छ ।

नेकपाले आफ्ना नेता कार्यकर्ताहरु गिरफ्तारी गरेको भन्दै बन्द आब्हान गरेको हो   ।

बुटवलमा भने कार्यकर्ता विन नै बन्द भएको छ ।