featured photo: Darpanpost

अमृत भट्टराई,

१० साउन , बुटवल ।   नेपाल तरुण दलले बुटवलमा बुधबार शक्ति प्रदर्शन गर्यो । सरकारले गरेको दमनको बिरोध र डा गोबिन्द केसीको स्वास्थ्य चिकित्सा क्षेत्रको जायज मागको समर्थनमा नेपाल तरुण दलले बुटवलमा बुधबार शक्ति प्रदर्शन गरेको छ । नेपाल तरुण दल, क्षेत्र न २ रुपन्देही क्षेत्रिय समिति र बुटवल उपमहानगर समितिको संयुक्त आयोजनामा बुधबार शान्तिपूर्ण रयाली सहित शक्ति प्रदर्शन गरेको हो । बिपी चोकबाट शुरु भएको रयाली महेन्द्र पार्क, अस्पताल लाईन हुदै ट्राफिक चोकमा आएर कोणसभामा परिणत भएको थियो । उनीहरुले डा.गोविन्द केसी जिन्दाबाद, सत्याग्रही डा.केसीका माग पुरा गर, बढ्दो मंहगी नियन्त्रण ­­गर, डा.केसीको माग पुरा ,अधिनायकबादी सरकार मुर्दाबाद,महिला हिंसा बन्द गर जस्ता नाराबाजी गरेका थिए । कोणसभालाई सम्बोधन गर्दै नेपाली काग्रेसका जिल्ला सभापति तथा पूर्वमन्त्री अब्दुल रज्जाकले सम्बोधन गर्दै प्रजातन्त्रमा शान्तिपूर्ण विरोध गर्न पाउने अधिकार सरकारले कुन्ठित गर्ने काम गरेको बताए । नेपाल मेडिकल काउन्सिलका केन्द्रिय सदस्य डा कृष्ण खरेलले डा केसीले केवल दुईवटा र त्यो पनि आम नागरिकको पक्षमा हुने गरि माग राखेर अनसन बसेको बताए ।

कुनै चिकित्सकको हितका लागि वा ब्यक्तिगत फाईदा हुने उनको माग नभएको दाबी गर्दैै उनले आम नेपाली जनता गुणस्तरीय चिकित्सक सेवा र दुरदराजमा रहेको जनताहरुका छोराछोरीले चिकित्सा शिक्षा सर्वसुलभ पाउनुपर्ने मुख्य माग डा केसीको रहेको बताए । उनले डा केसी अब महात्मा केसी भएको दाबि गरे । नेपाल चिकित्सक संघ, लुम्बिनी अंचलका सचिव डा ईन्द्र ढकालले पन्धौ पटक र अहिले २५ औ दिनको अनशनमा रहेको केसीको जायज मागलाई सरकारले सम्बोधन गर्नुपर्ने सुझाव दिए । नेपाली काग्रेसको सरकारको पालामा अध्यादेशमार्फत टुङगाएको डा.कसीको मागलाई माफियाको पक्षमा हुने गरि वर्तमान सरकारले बङ्गाउने काम गरेको उनले आरोप लगाए । तरुण दलका केन्द्रिय अध्यक्ष जितजंग बस्नेत सहीतका ४ सय कार्यकर्तामाथि सरकारले दमन गरेको भन्दै उनीहरुले बिरोध जनाए । तरुण दल नगर सभापति सुजन पुन, काग्रेसका युवा नेता प्रजापाल गिरीले सम्बोधन गर्दै जायजमागलाई सरकारले सम्बोधन गर्नुपर्ने बताए । कार्यक्रममा यस क्षेत्रका मानव अधिकारवादी, चिकित्सकहरुको एकवद्धता रहेको क्षेत्रिय समिति क्षेत्र नं २ का अध्यक्ष हसन्त लामाले बताए ।