featured photo: Darpanpost

बागलुङ ।

बागलुङको काठेखोला गाउँपालिकाले आगामी आर्थिक वर्षमा गाउँपालिका भित्र ‘एक गाउँ एक उत्पादन’ कार्यक्रम प्राथमिकताका साथ सञ्चालन गर्ने भएको छ । कृषि उत्पादनमार्फत रोजगारीको सिर्जना र गाउँ पालिकालाई आत्मनिर्भर बनाउन भन्दै गाउँपालिकाले ‘एक गाउँ एक उत्पादन’ कार्यक्रम सुरु गर्न लागेको हो ।

तेस्रो गाउँ सभामा आगामी आर्थिक बर्ष २०७५÷०७६ को नीति तथा कार्यक्रम प्रस्तुत गर्दै गाउँपालिका अध्यक्ष अमर थापाले काठेखोलालाई कृषिजन्य उत्पादनमा आत्मनिर्भर बनाउनको लागि मौसम र भुगोलका आधारमा ‘एक गाउँ एक उत्पादन’ कार्यक्रम सञ्चालन गरिने बताउनुभएको थियो । भौगोलिक अवस्था र माटोको उत्पादन क्षमताका आधारमा गाउँपालिकाका अधिकांश वडामा आलु बाली उपयुक्त रहेको गाउँपालिकाले जनाएको छ ।

गाउँपालिकाको वडा नं १ देखी ४ सम्मका उपल्लो भागमा आलुको पकेट क्षेत्रको रुपमा विकास गर्ने योजना गाउँपालिकाले बनाएको छ । त्यस्तै, वडा नं ७ र ८ मा पनि आलु राम्रो फल्ने भएकाले आलुकै पकेट क्षेत्रको रुपमा विकास गरिने छ ।

बागलुङमा चर्चामा रहने गरेको बिहुँको सुन्तलालाई अझै बजारीकरण गर्न र उत्पादन बढाउनका लागि भन्दै गाउँपालिकाको वडा नं ५ र ६ मा भने सुन्तलाको पकेट क्षेत्र कायम गरिने अध्यक्ष थापाले बताउनुभयो ।